1030 पटक हेरिएको 
इलाम। इलाम नगरपालिकाल राजश्वलाबाट हुने संभावित संक्रमण रोक्न विद्यालयमा छात्राहरुको उपस्थिति नियमित गराउनका लागि निःशुल्क सेनेटरी प्याड उपलब्ध गराउने भएको छ । बाल दिवशकै दिन आइतबार बसेको इलाम नगरपालिकाको नगरकार्यपालिकाको बैंठकले यस्तो निर्णय गरेको हो ।
सोही बैंठकले नगरभित्रको नामाकरण नभएका बाटो र चोकहरुको नामाकरण गर्ने निर्णय पनि गरेको छ । बैंठकले बियर र रक्सीका बोतलमा फोहर मैला व्यवस्थापन शुल्क वापत प्रति बोतल एक रुपैयाँ असूल गरी खाली बोतलहरु संकलन गरी व्यवस्थापन गर्ने निर्णय पनि गरेको छ ।
इलाम नगरपालिकाले वडा नं. ७ स्थित नयाँबजार क्षेत्रमा जिल्ला हुलाकदेखि पूर्व र सिटीमार्ट अगाडि रहेका नगरपालिकाले यसअघि बनाएको पसल र टहराहरु २०७६ फागुन मसान्त भित्रमा भत्काउने भएको छ ।
यसैगरी इलाममा रहेका सडक डिभिजन कार्यालय, खानेपानी तथा सरसफाइ डिभिजन कार्यालय र भेटेरेनरी अस्पताललगायत अन्य केही कार्यालयहरु इलामबाट हटाई अन्यत्र लगिएको र लैजाने कार्य भइरहेकाले संघीय सरकार तथा प्रदेश सरकार, इलामका सांसदहरुलाई कार्यालयहरु यथावत राख्नका लागि अनुरोध गर्ने निर्णय समेत गरेको छ । । नेपालटार–मंगलबारे सडक मर्मत सुधार नहुँदा सो सडक दूरावस्थामा पुगेको भन्दैं सडक मर्मत सुधारको कार्य यथाशीघ्र गर्ने गराउने व्यवस्था मिलाई सहयोग गर्न सडक डिभिजन कार्यालय इलामलाई अनुरोध गर्ने निर्णय पनि गरेको छ ।
यसरीनै बैंठकले धरान उपमहानगरपालिका र इलाम नगरपालिका बीच भगिनी सम्बन्ध स्थापना भई सहकार्यमा विभिन्न क्रियाकलापहरु भइरहेको र सम्बन्धलाई अझ प्रगाढ बनाउनका लागि थप कार्यक्रमहरु निरन्तर रुपमा गर्ने निर्णय पनि गरेको छ ।
