936 पटक हेरिएको 
इलाम । सुपर माई हाइड्रो पावर कम्पनीले सेयरधनीलाई ७.१५ प्रतिशत नगद लाभांश बाँड्ने भएको छ । कम्पनीले इलाममा सञ्चालित ७.८ मेगावाटको सुपर माई जलविद्युत आयोजनामा लगानी गर्ने संस्थापक सेयरधनीलाई नगद लाभांश दिन लागेको हो ।
आर्थिक वर्ष २०७६/७७ सम्मको संचित नाफाबाट २ करोड ८२ लाख ७३ हजार ७ सय ५ रुपैयाँ नगद लाभांश बाँड्ने निर्णय भएको कम्पनीका सञ्चालक मोहनबिक्रम कार्कीले बताए । उनका अनुसार भदौ १६ गते बसेको सञ्चालक समिति बैठकले सेयरधनीलाई नगद लाभांश दिन प्रस्ताव गरेको हो ।
सञ्चालक समितिको प्रस्ताव आगामी असोज १७ गते हुने कम्पनीको छैटौं साधारणसभाबाट पारित भएपछि सेयरधनीमा लाभांश बाँडिने पनि उनले बताए । कम्पनीकाे चुक्ता पुँजी ३९ करोड ५० लाख रुपैयाँ छ ।
सुपर माई पब्लिक कम्पनी भए पनि सर्वसाधारणमा सेयर निष्कासन गरी नसकेकाले संस्थापक सेयरधनीले मात्रै नगद लाभांश पाउने भएका छन् । कम्पनीमा लगानी गर्ने १६ जना संस्थापक सेयरधनी छन् । कम्पनीले निर्माण गरेको सुपर माईले २०७५ कात्तिकदेखि व्यावसायिक विद्युत उत्पादन गर्दै आएको छ । निर्माण थालेको १८ महिनामा आयोजना सम्पन्न भई विद्युत उत्पादन सुरु भएको थियो । यो आयोजना लक्ष्यभन्दा २१ महिनाअघि सञ्चालनमा आएको थियो । सुपर माईमा लगानी गरेको समूहले नै ९.६ मेगावाटको सुपर माई ‘ए’ र ३. सुपर माई क्यासकेड आयोजनाको सफल निर्माण गरी विद्युत उत्पादन सुरु गरिरहेको छ ।
